الاش ارداقتىسى ساكەن سەيفۋلليننىڭ بۇرىن-سوڭدى جاريالانباعان ۆيدەوسى تابىلدى

 رەسەي مەملەكەتتىك كينو-فوتوقۇجاتتار مۇراعاتىنان بەلگىلى الاش ارداقتىسى، اقىن، جازۋشى، قوعام قايراتكەرى ساكەن سەيفۋللين تۇسكەن بەينەجازبا تابىلدى، دەپ حابارلايدى Kazinform اگەنتتىگى. 

مەملەكەت قايراتكەرى بەينەلەنگەن بۇل كادرلار 1935 -جىلى قازاق اۆتونومياسىنىڭ قۇرىلعانىنا 15 جىل تولۋىنا وراي تۇسىرىلگەن.

تاسپانى ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ عىلىمي قىزمەتكەرى ەرمۇحامەت مارالبەك تاپقان.

«ينستيتۋتتىڭ احمەتتانۋ ءبولىمىنىڭ زەرتتەۋ باعىتى بويىنشا جۇرگىزىلىپ جاتقان «احمەت بايتۇرسىن ۇلىنىڭ جازۋ رەفورماسى: تەورياسى مەن تاجىريبەسى» گرانت جوباسى اياسىندا ماسكەۋدەگى مەملەكەتتىك ارحيۆكە ءۇش عالىم بارعان بولاتىنبىز. رەسەي مەملەكەتتىك كينو-فوتوقۇجاتتار مۇراعاتىندا بولدىق. سول ارحيۆتىڭ قۇجاتتار كاتالوگىمەن تولىق تانىسىپ، وزىمىزگە قاجەتتىلەرىن قاراعاندا ساكەن سەيفۋللين بەينەجازباسى كەزدەيسوق قولىمىزعا ءتۇستى»، - دەدى ە. مارالبەك QAZAQSTAN ارناسىنا بەرگەن سۇحباتىندا.

ساكەن سەيفۋللينمەن بىرگە، وراز جاندوسوۆ، ءالىبي جانگەلدين، وراز يسايەۆ سىندى تۇلعالاردىڭ ۆيدەوسىن ەلگە الىپ كەلگەن جاس عالىمداردىڭ قورجىنىندا كوپتەگەن ولجا بار.

ونىڭ ءبارىن ينستيتۋت الداعى ۋاقىتتا جاريالايدى.