قازاق حاندىعىنىڭ 550 جىلدىعىنا ارنالعان «قاسيەتتى دومبىرا» بايقاۋىنىڭ جەڭىمپازدارى انىقتالدى
بۇل تۋرالى كوكشەتاۋ قالاسى اكىمىنىڭ باسپا ءسوز قىزمەتىنەن حابارلادى.
ۇلتتىق ونەردى وسكەلەڭ ۇرپاق پەن ونەر سۇيەر جۇرتشىلىققا كەڭىنەن ناسيحاتتاۋ، جاس تالانتتار مەن شەبەر ورىنداۋشىلاردى انىقتاپ، ولاردىڭ شىعارماشىلىق دامۋىنا دەمەۋ كورسەتۋ ماقساتىندا ۇيىمداستىرىلعان بايقاۋعا كوكشەتاۋ، ستەپنوگور قالالارى، اقكول، ەڭبەكشىلدەر جانە بۇلاندى اۋداندارىنان كەلگەن بارلىعى 25 جاسوسپىرىم قاتىسىپ، شەبەرلىكتەرىن ورتاعا سالدى.
بايقاۋ جەڭىمپازدارى ءۇش اتالىم بويىنشا انىقتالدى. ونىڭ ىشىندە ستەپنوگورلىك ماديار كانافين «ۇزدىك كۇيشى» اتانسا، اقكول اۋدانىنان كەلگەن قۇرالاي نۇردۋللايەۆا «ۇزدىك ءداستۇرلى ءانشى»، بۇلاندىلىق شامان ءومىرزاق «ۇزدىك تەرمەشى» اتالىمى بويىنشا جەڭىمپاز دەپ تانىلدى.
جەڭىمپازدار كوكشەتاۋ قالاسىنىڭ كۋبوگى، ديپلوم جانە باعالى سىيلىقتارمەن ماراپاتتالدى.
ايتا كەتەيىك، قازاق حاندىعىنىڭ 550 جىلدىعىنا ارنالعان «كوكشەتاۋ قالاسىنىڭ جاستار رەسۋرستىق ورتالىعى» ك م م، «اقمولا وبلىسى «جاس ۇلان» ءبىرىڭعاي بالالار مەن جاسوسپىرىمدەر ۇيىمى» قوعامدىق بىرلەستىگىنىڭ ۇيىمداستىرۋىمەن وتكەن بايقاۋعا كوكشەتاۋ قالاسى اكىمدىگى جانە اقمولا وبلىسى ءبىلىم باسقارماسى قولداۋ ءبىلدىردى.
اۆتور: اسلان وسپانوۆ