ەۋروپادا قازاق حاندىعىنىڭ 550 جىلدىعىنا ارنالعان العاشقى كونفەرەنتسيا وتۋدە - فوتو

استانا. قازاقپارات - بۇگىن ۆەنگريا استاناسى بۋداپەشت قالاسىندا حالىقارالىق تۇركى اكادەمياسى مەن قازاقستان رەسپۋبليكاسىنىڭ ۆەنگريادىعى ەلشىلىگى ۇيىمداستىرعان «ۇلى دالاداعى مەملەكەتتىك ءداستۇر ساباقتاستىعى» اتتى حالىقارالىق كونفەرەنسيا ءوز جۇمىسىن باستادى.

قازاق حاندىعىنىڭ 550 جىلدىعىنا وراي ەۋروپا تورىندە العاش ءوتىپ جاتقان جيىنعا ۆەنگريا عىلىم اكادەمياسى قولداۋ كورسەتىپ وتىر.

بۇل تۋرالى حالىقارالىق تۇركى اكادەمياسىنىڭ اقپاراتتىق، عىلىمي- تانىمدىق پورتالى (http://twesco.org/) حابارلادى.

القالى جيىنعا قازاقستان، ازەربايجان، قىرعىزستان، تۇركيا جانە ۆەنگريانىڭ بەلگىلى عالىمدارى مەن قوعام قايراتكەرلەرى قاتىساۋدا. اتاپ ايتقاندا، باسقوسۋدى قازاقستاننىڭ ۆەنگرياداعى ەلشىسى نۇرباح رۇستەموۆ، ۆەنگريا مەملەكەتتىك حاتشىسىنىڭ ورىنباسارى جولت چۋتورا، تۇركسوي ۇيىمىنىڭ باس حاتشىسى دۇيسەن قاسەيىنوۆ، حالىقارالىق تۇركى اكادەمياسىنىڭ پرەزيدەنتى دارحان قىدىرالى، ۆەنگريا عىلىم اكادەمياسى گۋمانيتارلىق عىلىمدار زەرتتەۋ ورتالىعى ديرەكتورىنىڭ ورىنباسارى بالاجا بالوگا، تۇركى كەڭەسى جانىنداعى اقساقالدار كەڭەسىنىڭ مۇشەسى ءادىل احمەتوۆ، بۋداپەشتتەگى يۋنۋس ەمرە اتىنداعى تۇرىك مادەنيەتى ورتالىعىنىڭ ديرەكتورى ياكۋپ گۇل جانە تۇركى كەڭەسىنىڭ حالىقارالىق وكىلى حاتيجە تۋگبا يكيزلەر قۇتتىقتاۋ ءسوز سويلەپ اشتى.

بۇدان ءارى كونفەرەنسيا بەلگىلى عالىمداردىڭ باياندامالارىمەن جالعاسىن تابادى. قاتىسۋشىلاردىڭ قاتارىندا پروفەسسورلار زاردىحان قينايات ۇلى (قازاقستان)، قادىرالى كونقوبايەۆ (قىرعىزستان)، يشتۆان زيموني (ۆەنگرياداعى سەگەد ۋنيۆەرسيتەتى التايستيكا كافەدراسىنىڭ جەتەكشىسى)، بولات كومەكوۆ (قازاقستان)، ماريا يۆانيچ (ۆەنگريا عىلىم اكادەمياسى تۇركولوگيالىق زەرتتەۋلەر توبىنىڭ جەتەكشىسى)، سونىمەن قاتار باقىت ەجەنحان ۇلى (حالىقارالىق تۇركى اكادەمياسى)، ءداۋىت شومپاي (ۆەنگريا عىلىم اكادەمياسى)، راۋشان مۇقىشەۆا (ۆەنگريا، سەگەد ۋنيۆەرسيتەتى)، ەستەر وتتو-كوۆاچ (سەگەد ۋنيۆەرسيتەتىنىڭ PhD تىڭداۋشىسى) قاتارلى عالىمدار بار.

بارشاعا بەلگىلى، قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ باستاماسىمەن بيىل قازاق حاندىعىنىڭ 550 جىلدىعى رەسپۋبليكالىق جانە حالىقارالىق دەڭگەيدە كەڭىنەن اتالىپ وتۋدە. وسىعان وراي حالىقارالىق تۇركى اكادەمياسى قازاقستاندا جانە شەت مەملەكەتتەردە بىرنەشە عىلىمي جيىندار ۇيىمداستىردى. ءتۇبى ءبىر تۇركى حالىقتارى تاريحي اتاجۇرت سانايتىن ۇلى دالا تاريحىن شەتەلدەردە تانىتا تۇسەتىن ۆەنگرياداعى كونفەرەنتسيا سول باستامانىڭ جالعاسى بولىپ سانالادى.

ايتا كەتۋ كەرەك، بۇل جيىننىڭ ماديارلار ەلىندە ءوتۋىنىڭ وزىندىك سەبەبى بار. عۇندار مەن اتيللانىڭ ۇرپاقتارى سانالاتىن ماجارلار وزدەرىن ۇلى دالانىڭ بولشەگى دەپ ەسەپتەيدى. سوندىقتان قازاقستاننىڭ ۆەنگرياداعى ەلشىسى ن. رۋستەموۆتىڭ ۇيتقى بولۋىمەن ۇيىمداستىرىلعان شاراعا ماجار عالىمدارى ۇلكەن قولداۋ كورسەتۋدە.