پوليتسەيلەردى 500 مەترگە سۇيرەگەن: قىزىلوردالىق جۇرگىزۋشى قاماۋعا الىندى
8- تامىز كۇنى جاڭاقورعان اۋداندىق پوليتسيا ءبولىمىنىڭ پاترۋلدىك قىزمەتكەرلەرى ەرەجەنى بۇزعان كولىك جۇرگىزۋشىسىن توقتاتقان.
پوليتسيا قىزمەتكەرلەرى زاڭ شەڭبەرىندە كولىك جۇرگىزۋشىسىنە اۆتوكولىكتەن ءتۇسىپ، قۇجاتتارىن كورسەتۋىن سۇراعان ۋاقىتتا جۇرگىزۋشى ولاردىڭ زاڭدى تالابىنا باعىنباي، وقيعا ورنىنان «ءىزىن سۋىتپاق» بولعان. كولىك جۇرگىزۋشىسى دورەكىلىك تانىتىپ، ءوزىن وتە اگرەسسيۆتى ۇستادى. قارسىلىق كورسەتكەننەن بولەك، ول كولىگىنىڭ مەملەكەتتىك ءنومىرىن شەشىپ الىپ، كولىكتى توقتاتۋ ماقساتىندا ارەكەتتەنگەن پوليتسيا قىزمەتكەرلەرىن 500 مەترگە دەيىن سۇيرەپ بارعان، - دەلىنگەن پوليتسيا حابارلاماسىندا.
ءمالىم ەتىلگەندەي، پوليتسيا قىزمەتكەرلەرى ءتۇرلى دارەجەدە جاراقاتتار الدى.
اتالعان دەرەك بويىنشا ق ر قىلمىستىق كودەكسىنىڭ 380-بابىنىڭ 4-بولىگى 1-تارماعىنا (بيلىك وكىلىنە قاتىستى قورقىتۋ نەمەسە كۇش كورسەتۋ ارەكەتتەرى) سايكەس سوتقا دەيىنگى تەرگەپ-تەكسەرۋ ارەكەتتەرى جۇرگىزىلىپ جاتىر. ءتيىستى ساراپتامالار تاعايىندالدى. كولىك جۇرگىزۋشىسى جاڭاقورعان اۋداندىق پوليتسيا ءبولىمىنىڭ ۋاقىتشا ۇستاۋ يزولياتورىنا قامالدى. اۆتوكولىك ايىپ الاڭىنا قويىلدى. اتالعان باپ بويىنشا كۇدىكتى ءۇش جىلدان جەتى جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازاعا تارتىلۋى مۇمكىن. قازىرگى ۋاقىتتا پوليتسەيلەرگە قارسىلىق كورسەتۋ، كۇش قولدانۋ دەرەكتەرى بويىنشا قىلمىستىق ىستەر تاتۋلاسۋ نەگىزىندە توقتاتىلمايتىنىن ەسكەرتەمىز، - دەدى قىزىلوردا وبلىسى پوليتسيا دەپارتامەنتىنىڭ باستىعى ماحسۋدحان ابلازيموۆ.
ايتا كەتەتىن جايت، جىل باسىنان قىزىلوردا وبلىسىندا پوليتسەيلەرگە قارسىلىق كورسەتۋدىڭ 6 دەرەگى بولعان. ءاربىر ءىس بويىنشا زاڭ شەڭبەرىندە ءتيىستى شەشىم قابىلداندى.