تارازدا «قازاق حاندىعى» مونۋمەنتىنىڭ اشىلۋىنا 5000 قوناق قاتىسۋى كۇتىلۋدە

تاراز. قازاقپارات - قازاق مەملەكەتتىلىگىنىڭ 550 جىلدىق مەرەيتويلىق سالتاناتى «قازاق حاندىعى» مونۋمەنتىنىڭ اشىلۋىمەن باستالادى، دەپ ءمالىم ەتتى تارازدا باسپا ءسوز ءماسليحاتى بارىسىندا جامبىل وبلىسى اكىمىنىڭ ورىنباسارى ەرقانات ءمانجۋوۆ.

«قازاق حاندىعىنىڭ 550 جىلدىعى» مونۋمەنتىنىڭ سالتاناتتى اشىلۋ راسىمىنە بەس مىڭنان استام قالا تۇرعىندارى مەن قوناقتارى جينالادى، - دەدى ول. - ادامداردى جەتكىزۋ ءۇشىن بىزدە ولاردى جينايتىن ورىن، كولىك بەلگىلەندى. قالالىق بيلىك ءى ءى د- مەن بىرگە جولباعىتتى پىسىقتادى. ءبىزدىڭ مىندەتىمىز - قوناقتار ءۇشىن بارىنشا جايلى جاعداي تۋعىزۋ، ولار قوعامدىق كولىكپەن قاتىناپ، جەكە كولىكتىڭ از بولۋىنا كوڭىل بولەمىز. مونۋمەنت اشىلعاننان كەيىن (ءبىز وڭتۇستىك قوناقجاي قالامىز عوي) قوناقتارعا مەرەكەلىك قوناعاسى بەرمەكپىز».

تارازدىڭ كىرەبەرىسىندە ورنالاسقان «قازاق حاندىعى» مونۋمەنتى قازاق مەملەكەتتىلىگىنىڭ تاريحي ماڭىزىن ايعاقتايدى. مۇسىندىك كومپوزيتسياعا اق ءمارماردان جاسالعان 27 مەترلىك ستەلا جانە كەرەي مەن جانىبەك حانداردىڭ 5 مەترلىك مۇسىندەرى كىرەدى، ولار سونادايدان جاقسى كورىنەدى جانە قالانىڭ باتىس بولىگىنىڭ لاندشافتىلىق پانوراماسىن ايشىقتايدى.

مونۋمەنت ماڭىندا 3,5 گەكتار اۋماق اباتتاندىرىلىپ، گۇلزار جاسالعان جانە اۆتوتۇراق سالىنعان. ەسكەرتكىشتىڭ ءوزىن دايارلاپ، ورناتۋعا 350 ميلليون تەڭگە، اۋماقتى اباتتاندىرۋعا جانە اۆتوتۇراق ۇيىمداستىرۋعا - 177 ميلليون تەڭگە ءبولىندى. قۇرىلىسپەن جانە اباتتاندىرۋمەن «جامبىل ح ي م قۇرىلىس ينجينيرينگ» ج ش س، ەسكەرتكىشتى جاساۋمەن جانە ورناتۋمەن - «قازارتسيستەم» ج ش س اينالىسۋدا.

بۇگىنگى كۇنى مونۋمەنتتى ورناتۋ جانە ونىڭ ماڭىنداعى اۋماقتى اباتتاندىرۋ جۇمىستارى 98 پايىز اياقتالدى.

ەسكە سالا كەتەيىك، قازاق حاندىعىنىڭ 550 جىلدىعىن مەرەكەلەۋ بيىلعى جىلى ەلدىڭ بارلىق وڭىرلەرىندە وتۋدە. بۇدان 550 جىل بۇرىن جايساڭ شاتقالىندا، تالاس جانە شۋ وزەندەرىنىڭ ارالىعىندا كەرەي جانە جانىبەك سۇلتاندار قازاق حاندىعىنىڭ ىرگەسىن قالاعان بولاتىن، جامبىل وبلىسىندا، 7، 8، 9- قازان كۇندەرى وسى ايتۋلى مەرەكە كەڭ اۋقىمدا اتالىپ وتەدى.