وبلىس اكىمى قۇمار اقساقالوۆ ەلباسىنىڭ «ۇلى دالانىڭ جەتى قىرى» ماقالاسىنىڭ اياسىندا وڭىردە بوتاي مادەنيەتىنىڭ مۋزەيىن - ەنەوليت داۋىرىندەگى تايپالار مادەنيەتىنىڭ ەسكەرتكىشىن سالۋ جۇمىستارى جالعاسىپ جاتقانىن جەتكىزدى. اكىمنىڭ ايتۋىنشا، بۇعان 2019 -جىلى رەسپۋبليكالىق بيۋدجەتتەن 2 ميلليارد تەڭگە بولىنەدى.
بوتاي قونىسى ايىرتاۋ اۋدانىندا ورنالاسقان. شەتەلدىك زەرتتەۋشىلەر جىلقى مالى العاش رەت ءبىزدىڭ زامانىمىزعا دەيىنگى ءتورتىنشى مىڭ جىلدىقتا سولتۇستىك قازاقستان اۋماعىندا قولعا ۇيرەتىلگەنىن راستاپ وتىر.
وسى قونىس تۋرالى قۇمار اقساقالوۆ قازاقستان مەن رەسەيدىڭ پرەزيدەنتتەرىنە پەتروپاۆلدا وتكەن XV ءوڭىرارالىق ىنتىماقتاستىق فورۋمىندا ايتىپ بەرگەن بولاتىن.
جەرگىلىكتى بيلىك ءتۋريزمدى دامىتۋ بويىنشا اۋقىمدى جوسپار جاساپ وتىر. وبلىس اكىمى يمانتاۋ- شالقار كۋرورتتىق ايماعىن دامىتۋ جوسپارىنىڭ جاسالىپ جاتقانى، استانا مەن رەسەيدىڭ وڭىرلەرىن جالعايتىن اۆتوموبيل جولدارىنىڭ كۇردەلى جوندەلگەنىن ايتتى.
وبلىس اكىمدىگىنىڭ وكىلدەرى سوڭعى ەكى جىلدا رەسەي فەدەراتسياسىنىڭ وڭىرلەرىنەن سولتۇستىك قازاقستانعا كەلگەن تۋريستەردىڭ سانى ەكى ەسە ارتقانىن ايتىپ وتىر. 2019 -جىلى بۇل كورسەتكىش تاعى دا ەسەلەنە تۇسەدى دەگەن ءۇمىت بار.
اۆتور: ولەسيا جۋكوۆەن