ق ر قارۋلى كۇشتەرىنە 25 جىل: ساربازدىڭ ءبىر كۇنى قالاي وتەدى؟
وسىعان وراي، «قازاقپارات» اگەنتتىگى ساربازدىڭ ءبىر كۇندىك وتان الدىنداعى قىزمەتى قالاي وتەتىنىن ءبىلۋ ءۇشىن الماتى قالاسىنداعى ق ر ۇلتتىق ۇلانى 5571 اسكەري بولىمىنە باردى.
وتان الدىنداعى بورىشىن وتەپ جاتقان اقتوبەلىك سارباز، ق ر ۇلتتىق ۇلانى 5571 اسكەري ءبولىمىنىڭ جاۋىنگەرى ەلجان سادىق ساربازدار بورىشىن قالاي وتەپ جاتقانىن ايتىپ بەردى.
«اسكەردەگى ەڭ ءبىرىنشى تالاپ - تازالىق پەن توزىمدىلىك»، - دەيدى ەلجان سادىق.
ءبىزدىڭ كەيىپكەرىمىز 2016-جىلدىڭ مامىر ايىندا اقتوبە قالاسىنان اسكەر قاتارىنا شاقىرتىلعان. بيىلعى مامىردا اسكەري بورىشىن وتەپ، ەلىنە قايتۋعا ازىرلەنىپ ءجۇر.
«اسكەر - ۇلكەن جول، ەكى اپتادان سوڭ اسكەري بورىشىمدى وتەۋ مەرزىمىم اياقتالادى. باۋىرجان مومىش ۇلى اتامىز: «ارميا - ازاماتتىق زور مەكتەپ» دەگەن. ۇلكەن ءومىر مەكتەبىنەن ءوتتىم دەپ ويلايمىن. اسىرەسە، شىدامدىلىق، توزىمدىلىككە ۇيرەندىك. ماماندىعىم - ينجەنەر-مەتاللۋرگ. اقتوبە قالاسىنداعى ق. جۇبانوۆ اتىنداعى اقتوبە مەملەكەتتىك ۋنيۆەرسيتەتىن بىتىرگەم. اسكەردەن سوڭ ماماندىعىم بويىنشا قىزمەت ەتسەم دەيمىن. ۇيدە كۇتىپ وتىرعان اتا-انام بار. اللادان اماندىعىمىزدى سۇراپ، كۇتىپ وتىرعان اعايىندارىم بار. ەندى سولاردىڭ ءۇمىتىن، اكەمنىڭ ءۇمىتىن اقتاسام دەيمىن»، دەگەن ەلجان سادىق ءدال ءبىز بارعان كۇنى جاساق باسشىسى بولىپ قىزمەتكە اتتانعالى جاتقان.
«ۇلتتىق ۇلان قوعام قاۋىپسىزدىگىن قامتاماسىز ەتەدى. ءبىزدىڭ ءاربىر اتقان كۇنىمىز وتان الدىنداعى بورىشىمىزدى وتەۋگە ارنالىپ جاتىر. ءار كۇنىمىز تاڭعى التىدا باستالادى، جاتتىعۋلار جاسايمىز. سوسىن، ساربازدىڭ جەكە گيگيەنالىق تازالىعى مەن كۇتىمى بار. سودان كەيىن، ءتۇرلى باعىتتاعى ساباقتار باستالادى. قىزمەتتىك دايىندىقتار، مەملەكەتتىك قۇقىق، جاۋىنگەرلىك ساباقتار وتكىزىلەدى. ودان كەيىن قىزمەتكە دايىندالامىز. قىزمەتىمىز الماتى قالاسىنداعى 8 اۋداندى ارالاپ، ءتارتىبىن قاداعالاۋ. ءبىز نەگىزىنەن مەدەۋ اۋدانىنداعى تىنىشتىقتى ساقتاۋعا قىزمەت ەتەمىز»، - دەدى ەلجان سادىق.
ۇلتتىق ۇلان ساربازدارىنىڭ كوشە ءتارتىبىن قاداعالايتىنى بەلگىلى. ولاردىڭ قىزمەتىندە ءتۇرلى وقيعالار كەزدەسىپ جاتادى. سارباز ەلجان سادىق ءوز تاجىريبەسىندە 3-4 رەت ءتارتىپ بۇزعان بۇزاقىنى ۇستاعانىن ايتتى.
ول ءۇشىن بىرنەشە رەت اسكەري ءبولىم باسشىلىعى تاراپىنان ماراپاتتالىپتى. «مۇندا قازاقستاننىڭ تۇكپىر-تۇكپىرىنەن كەلگەن جىگىتتەرمەن ارالاسىپ، دوستاسىپ كەتتىك. قيماستىق سەزىم بار. «اسكەردەگى دوس - ەڭ سەنىمدى دوس» دەپ ويلايمىن»، - دەيدى اقتوبەلىك ۇلان.
ساربازبەن قاۋىپسىزدىك ماسەلەسى ءسوز بولعاندا بىلتىر ءوزىنىڭ تۋعان ولكەسى اقتوبەدە بولعان لاڭكەستىك وقيعاسى تۋرالى سۇراپ، جات ءدىني اعىمداردان ساقتاندىرۋ ءۇشىن ءتۇرلى ءتۇسىندىرۋ جۇمىستارى وتكىزىلىپ تۇراتىنىن بىلدىك.
«ءبىزدى اسكەرگە شاقىرعاننان كەيىن، اقتوبەدەگى 6655 اسكەري بولىمىنە لاڭكەستەر شابۋىل جاساعانىن ەستىپ، قابىرعامىز قايىستى. سول ءۇشىن بىزدە جات ءدىني اعىمداردان ساقتاندىرۋ، ءتۇسىندىرۋ جۇمىستارى جۇرگىزىلەدى»، - دەيدى ەلجان.
«اس ادامنىڭ ارقاۋى». قۋاتتى تاعامسىز ساربازدىڭ قىزمەتى وتەلمەس. ەلجان ساربازدار كۇنىنە ءۇش رەت تاماقتاناتىنىن، اس ساپاسى جوعارى ەكەنىن ايتتى.
«ءۇش ۋاقىت تاماقتانامىز. تاماق وتە ساپالى. تاڭعى، تۇسكى اس، كەشكە قىزمەتتەن كەلگەن سوڭ كەشكى اس بەرىلەدى. ماي، ىرىمشىك تە بەرىلەدى. تاماق ساپاسى قاتتى باقىلۋدا. سوسىن، ايتا كەتەرلىگى، اسكەردە ەڭ ءبىرىنشى تالاپ تازالىق. توسەك جابدىق اپتا سايىن اۋىستىرىلىپ، مونشاعا تۇسەمىز، كيىمدەر دە اپتاسىنا ءبىر رەت اۋىستىرىلادى»، - دەيدى جاۋىنگەردىڭ ءبىر كۇندىك ءومىرىن ايتىپ بەرگەن سارباز.
ءبىز سۇحباتىمىزدى اياقتاپ كەتۋگە ىڭعايلانعانىمىزدا، «پ ر 73» رەزەڭكەلى تاياق، ارنايى بايلانىس قۇرالى - راتسيا مەن پلانشەتنيك، سوسىن كىسەن مەن ىسقىرعىشىن الىپ، ەلجان دا قىزمەتىنە شىقتى. ول بۇگىن قاس قارايعانشا ەل تىنىشتىعىن كۇزەتىپ، ءوز قاراۋىنداعى 3 پاترۋلمەن مەدەۋ اۋدانىن ارالاپ شىعادى.