جۇمىسسىزدارعا اي سايىن 224000 تەڭگەگە جاردەماقى قالاي تولەنەدى؟
بۇل تۋرالى الماتى قالالىق حالىققا قىزمەت كورسەتۋ ورتالىعىنداعى قىزمەتكەر اراي ابىلبەكوۆا ايتىپ بەردى.
قانداي قۇجات كەرەك؟
جاردەماقىنى مىندەتتى ساقتاندىرۋ جۇيەسى بار كەز كەلگەن ازامات الا الادى.
«جۇمىسسىز قالعان ازامات قىزمەتىنەن ايىرىلعان جاعدايدا مىندەتتى ساقتاندىرۋ جۇيەسى قورىنان تاعايىندالاتىن جاردەماقىسىن تالاپ ەتۋگە مىندەتتى. ال الەۋمەتتىك اۋدارىم جاساماعان قىزمەتكەر جاردەماقى الا المايدى»، - دەدى ح ق ك و قىزمەتكەرى.
ول ءۇشىن الدىمەن جۇمىسسىز رەتىندە تىركەلۋ كەرەك.
«جۇمىسسىز رەتىندە تىركەلۋ ءۇشىن جۇمىسپەن قامتۋ ورتالىعىنا نەمەسە ەلەكتروندى ەڭبەك بيرجاسىنىڭ سايتىنان ونلاين راسىمدەۋگە بولادى. بۇل ءۇشىن جەكە كۋالىك پەن ءوتىنىش جازۋ كەرەك. ال ەگەر جالعان مالىمەتتەر بەرگەن جاعدايدا جاردەماقى بەرىلمەيدى. جالپى جۇمىسسىز رەتىندە تىركەلگەن كۇننەن باستاپ جاردەماقى تاعايىندالادى»، - دەدى ول.
مەرزىمى مەن مولشەرى قالاي ەسەپتەلەدى؟
جاردەماقىنىڭ مەرزىمى جۇمىسسىز ازاماتتىڭ ەڭبەك وتىلىمەن جانە الەۋمەتتىك اۋدارىم جۇرگىزىلۋىمەن تىكەلەي بايلانىستى بولادى.
«ماسەلەن، 6-12 اي ىشىندە الەۋمەتتىك اۋدارىمدار ءتۇسىپ وتىرسا، ءبىر اي تاعايىندالادى. ارى قاراي سولاي ەسەپتەلە بەرەدى. ال مولشەرىنە بىرنەشە فاكتورلار اسەر ەتەدى. اتاپ ايتساق، الەۋمەتتىك ساقتاندىرۋ قورىنا جاسالعان مولشەرى مەن تابىسى جانە ەڭبەك ءوتىلى. ەسەپتەۋدىڭ ارنايى فورمۋلاسى بار، تاعايىندالاتىن كەزدە ناقتى مولشەرىن سۇراۋعا بولادى. مىسالى، جۇمىسسىز قالعان ادامنىڭ جالاقىسى - 150 مىڭ تەڭگە. جالپى، جاردەماقىنى ەسەپتەۋ ءۇشىن الىناتىن سوڭعى ەكى جىلداعى ورتاشا تابىس مولشەر ەڭ تومەنگى جالاقى كولەمىنەن اسپاۋى ءتيىس. جاردەماقى مولشەرى ەسەپتەۋ فورمۋلاسىنا سايكەس ءار ازاماتقا ەسەپتەلىپ، 35000 تەڭگەدەن باستالىپ، 224000 تەڭگەگە دەيىن تولەنەدى. ساقتاندىرۋ قورىنا 10 جىل بويى تولەم جاسالعان دەيىك. وندا وعان جۇمىسسىز ادام رەتىندە اي سايىن 66000 تەڭگە بەرىلىپ وتىرادى. ءبىراق اتقارۋشىلىق ءىس جۇرگىزۋ بويىنشا مەملەكەت جاردەماقىدان ءتيىستى مولشەردى ۇستاپ قالۋعا قۇقىعى بار»، - دەدى اراي ابىلبەكوۆا.
ونىڭ ايتۋىنشا، جۇمىسسىز ازامات قوعامدىق جۇمىسقا تارتىلسا دا، جاردەماقى ساقتالادى. سونداي-اق، ۋاقىتشا جۇمىس، كاسىپكە بايلانىس وقۋعا جىبەرىلۋ سەبەپتەرىنە بايلانىستى جاردەماقى جالعاسا بەرەدى.
قانداي جاعدايدا توقتاتىلادى؟
جاردەماقى ءتۇرلى سەبەپتەرگە بايلانىستى ۋاقىتشا توقتاتىلادى.
«ماسەلەن، جۇمىسسىز رەتىندە تىركەلگەن ازامات رەسپۋبليكادان كەتسە، ق ر ازاماتتىعىنان شىقسا، قىلمىستىق ءىس بويىنشا سوتتالعان جازاسىن وتەۋشى بولسا، جاردەماقى ۋاقىتشا توقتاتىلادى. ال ەگەر جۇمىسسىزدىق تىزىمىنەن شىقسا، زەينەتكەرلىك جاسقا تولسا جانە الۋشى قايتىس بولعان جاعدايدا جاردەماقى بەرۋ تولىق توقتاتىلادى»، - دەدى اراي ابىلبەكوۆا.
Massaget.kz