ۇكىمەت 2050 -جىلعا دەيىن استانانى الەمدەگى ۇزدىك 50 قالانىڭ قاتارىنا قوسپاق

الداعى 27 جىلدا ەلوردانى «الەمنىڭ ۇزدىك قالالارى» حالىقارالىق رەيتينگىسىندە العاشقى 50 شاھاردىڭ قاتارىنا ەنگىزۋ جوسپارلانىپ وتىر.

بۇل تۋرالى ۇلتتىق ەكونوميكا مينيسترلىگى جاريالاعان «استانانى دامىتۋدىڭ كەيبىر ماسەلەلەرى تۋرالى» زاڭ جوباسىنىڭ كونسۋلتاتيۆتىك قۇجاتىندا جازىلعان، دەپ حابارلايدى قازاقپارات ءتىلشىسى.

«جوبانىڭ ماقساتى - 2050-جىلعا دەيىن استانا قالاسىن «الەمنىڭ ۇزدىك قالالارى» حالىقارالىق رەيتينگىسىندە العاشقى 50 قالانىڭ قاتارىنا كىرگىزۋ»، - دەلىنگەن اشىق ن ق ا پورتالىندا جاريالانعان كونسۋلتاتيۆتىك قۇجاتتا.

اتالعان مەجەگە ۇمتىلىس جولىندا مىنا باعىتتاعى جۇمىستاردى قولعا الۋ جوسپارلانعان:

- ەلوردانىڭ وزەكتى ماسەلەلەرىن، ونىڭ ىشىندە تۇرعىنداردىڭ شاعىمدارىن دەرەۋ شەشۋ؛

- استانانىڭ اقپاراتتىق بازاسىن قۇرۋ؛

- تۇرعىنداردىڭ ءال-اۋقاتىن ارتتىرۋ، بيزنەس ورتانى دامىتۋ؛

- گازبەن جىلىتۋعا كوشۋ، سونداي-اق رۇقسات ەتىلمەگەن قوقىس ۇيىندىلەرىن جويۋ ەسەبىنەن ەلورداداعى ەكولوگيالىق جاعداي مەن اۋا ساپاسىن جاقسارتۋ؛

- استانانىڭ ساۋلەتتىك كەلبەتىن ساقتاۋ؛

- قالادا كەدەرگىسىز ورتا قۇرۋ؛

- حالىق اراسىنداعى الەۋمەتتىك شيەلەنىستى تومەندەتۋ.

كونسۋلتاتيۆتىك قۇجات 5- قازانعا دەيىن كوپشىلىك تالقىلاۋدا بولادى.

سونىمەن قوسا وسى قۇجاتتا ءومىر سۇرۋگە قولايلى الەم قالالارىنىڭ «Quality of living city ranking» رەيتينگىسىندە الماتى شاھارى 177-ورىندا تۇرعانى جازىلعان.