شاڭحايدا ابايدىڭ 1 تومدىعى قىتاي تىلىندە جارىق كورەدى

نۇر- سۇلتان. قازاقپارات - ق ر پرەزيدەنتىنىڭ قازاقستان حالقىنا جولداۋى تۋرالى پىكىر بىلدىرگەن جازۋشىلار وداعىنىڭ ءتوراعاسى ۇلىقبەك ەسداۋلەت ءسۇيىنشى جاڭالىعىمەن ءبولىستى، دەپ حابارلايدى قازاقپارات ءتىلشىسى.

اقىننىڭ پىكىرىنە زەر سالساق، كەلەر جىلى تويلاناتىن ءۇش ۇلكەن داتانى اتاپ ءوتۋدىڭ فورماتىنا جاڭاشىلدىق قاجەت.

«مەملەكەت باسشىسى ءوز جولداۋىندا رۋحانيات تاقىرىبىن دا قوزعادى. سونىڭ ىشىندە ءال- فارابي 1150 جىلدىعىن، ۇلى ابايدىڭ 175 جىلدىعىن، التىن وردانىڭ 750 جىلدىعىن تويلاۋ تۋرالى ءسوز قوزعادى. بۇل عيبراتتى داتالار ۇرپاققا ءتالىم بەرۋىمەن قۇندى. ياعني، ىسىراپشىلدىققا، استا- توك مەيماناسىنا، ماسايراۋعا جول بەرىلمەۋى كەرەك. جولداۋدا دا بۇل شارالاردىڭ ۇرپاققا پايدالى، قوعامعا كەرەكتى، كەلەشەككە ونەگەلى جاقتارىن ۇستانۋ كەرەكتىگى ايتىلدى. التىن وردانىڭ 750 جىلدىعىندا قازاق تاريحىنا الەم نازارىن تاعى ءبىر اۋدارتۋ، سول ارقىلى ءتۋريزمدى دامىتۋ كوزدەلگەنى دە كوڭىلدەن شىعىپ وتىر. ويتكەنى، التىن وردانىڭ تاريحى - ءبىزدىڭ تاريح. ءبىزدىڭ تاريحىمىز - التىن وردانىڭ تاريحى» ، - دەيدى ۇ. ەسداۋلەت.

جازۋشىلار وداعىنىڭ باسشىسى بۇل تالاپقا قالامگەر قاۋىم دا ۇلەس قوساتىنىن ايتادى.

 «ءۇش تويدى دا عيبراتتى ەتىپ وتكىزۋ كەرەك دەپ جاتىرمىز عوي. مىسالى، قىتايدىڭ شانحاي قالاسىنداعى ءبىر باسپا مۇحتار اۋەزوۆتىڭ 10 تومدىعى مەن ابايدىڭ 1 تومدىعىن قىتاي تىلىنە اۋدارىپ شىعاراتىن بولدى. اتالمىش باسپا شىڭعىس ايتماتوۆتىڭ 10 تومدىعىن شىعارعان ەكەن. سونداعى اعايىندارىمىز ش. ايتماتوۆتىڭ ۇستازىن نەگە شىعارمايسىڭدار دەگەن ماعىنادا ۇسىنىس تاستاعان ەكەن، كەلىسىپتى. سونى ەستىپ، م. اۋەزوۆتىڭ دە ۇستازىن شىعارىڭىزدار دەگەن وي ايتقانبىز. بىردەن كەلىسىپ، ابايدىڭ 10 تومدىعىن شىعاراتىندارىن ايتتى. ابايدىڭ بارلىق شىعارماسى ءبىر تومنان اسپايتىنىن ءتۇسىندىرىپ، كەلىسىمگە كەلىپ قايتتىق» ، - دەيدى  ۇلىقبەك ەسداۋلەت.

ەسكە سالساق، ق ر پرەزيدەنتى قاسىم- جومارت توقايەۆ ءوز جولداۋىندا التىن وردانىڭ 750 جىلدىعى ءتۋريزمدى دامىتۋ تۇرعىسىندا تويلاناتىنىن ايتتى.