تۇركيا وزبەك بيلىگى تىيىم سالعان انشىگە 10 ايدىڭ ىشىندە ازاماتتىق بەردى
29- ناۋرىزدا تۇركيا ازاماتتىعىن العانى تۋرالى حاتتى وعان ەل پرەمەر-ءمينيسترى احمەت داۋىتوعلىنىڭ ءوزى جولداعان دەپ حابارلايدى ورتالىق ازيا جاڭالىقتارى.
41 جاستاعى ابدۋلازيز كاريمگە تۇركيا ازاماتتىعى «زاڭنان تىس ەرەكشەلىك» رەتىندە بەرىلگەن.
تۇركيا زاڭدارى بويىنشا، شەتەلدىك ازامات بۇل ەلدىڭ ازاماتتىعىن الۋى ءۇشىن ەل اۋماعىندا كەم دەگەندە 5 جىل تۇرۋى ءتيىس. ابدۋلازيز كاريمگە ازاماتتىق 10 ايدىڭ ىشىندە بەرىلدى.
«بۇل مەن ءۇشىن وتە قۋانىشتى جاڭالىق بولدى. ون اي بۇرىن تۇركيا ۇكىمەتى قۇجاتتارىمدى بەرۋدى سۇرادى. ولار مەنىڭ شىعارماشىلىعىما قىزىعاتىندارىن ايتتى. وزبەكستاندا مەنى ءانشى رەتىندە بىلسە دە، كومپوزيتور رەتىندە تانىلماعان ەدىم. ال مەن سيمفونيالىق شىعارمالار، ءبىر بولىمنەن تۇراتىن وپەرا دا جازدىم. ولاردىڭ ءبارىن وسىندا كورسەتتىم. مەنىڭ شىعارماشىلىعىم تۇركيا جۇرتشىلىعىنىڭ ەرەكشە قىزىعۋشىلىعىن تۋدىردى»، - دەدى ابدۋلازيز كاريم.
«وزبەكستاننىڭ ەڭبەك سىڭىرگەن ءارتىسى» ءانشى ءارى كومپوزيتور ابدۋلازيز كاريم 2015-جىلى تۋعان ەلىنەن كەتكەن. وتانىنان قونىس اۋدارۋىنا وزبەك بيلىگىنىڭ ونىڭ اندەرىنە تىيىم سالعانى سەبەپ بولدى.