ۇ ق ك بۇرىنعى ءتوراعاسىنىڭ سۇحباتتارىنداعى مالىمەتتەردى تەكسەرۋ كەرەك - ابزال قۇسپان
ءماجىلىس دەپۋتاتى ابزال قۇسپان باس پروكۋراتۋراعا ۇلتتىق قاۋىپسىزدىك كوميتەتىنىڭ بۇرىنعى ءتوراعاسى امانگەلدى شابداربايەۆ پەن «قازاتومونەركاسىپ» كومپانياسىنىڭ بۇرىنعى باسشىسى مۇحتار جاكىشەۆتىڭ سۇحباتتارىندا ايتىلعان مالىمەتتەردى تەكسەرۋدى ۇسىندى، دەپ حابارلايدى Kazinform اگەنتتىگى.
«بۇرىنعى ۇلتتىق قاۋىپسىزدىك كوميتەتىنىڭ ءتوراعاسى ا. شابداربايەۆتىڭ ءوزى بىرنەشە رەت اشىق سۇحبات بەردى. بۇرىنعى ءتوراعا، گەنەرال-لەيتەنانت ا. شابداربايەۆتىڭ سول كەزدەگى مەملەكەت باسشىلىعى تاراپىنان ۋران كەنىشتەرى كىمگە، قالاي ۇلەستىرىلگەنى تۋرالى سۇحباتتاردا ناقتى مىسالدار بار. ول كىسى ءارتۇرلى ساياسي فاميليالاردى اتاپ، كىمنىڭ قانداي قىلمىسقا بارعانىن اشكەرەلەدى. جەر-قازبا بايلىقتارىنا بايلانىستى، ولاردىڭ زاڭسىز ۇيلەستىرىلۋىنە تىكەلەي دالەلمەن مۇحتار جاكىشەۆ، تاعى دا باسقا ءبىرقاتار ازاماتتىڭ اشىق سۇحباتتارى، مالىمدەمەلەرى جاريالانىپ، وندا ءىرى كومپانيالارعا قازاقستان حالقىنا تيەسىلى بايلىقتىڭ تاراتىلۋى، زاڭسىز بەرىلۋ فاكتىلەرى ناقتى ايتىلعان. سوعان قاراماستان، قۇقىق قورعاۋ ورگاندارى، پروكۋراتۋرا تاراپىنان ەشقانداي رەاكسيا بايقالمايدى. بىردە ءبىر ماسەلە كوتەرىلمەيدى»، - دەلىنگەن دەپۋتاتتىق ساۋالدا.
زاڭگەردىڭ ايتۋىنشا، قىلمىستىق-پروتسەسستىك كودەكستىڭ 180-بابى وسىنداي سۇحباتتاردا ايتىلعان دەرەكتەر سوتقا دەيىنگى تەرگەپ-تەكسەرۋدى باستاۋعا مۇمكىندىك بەرەتىنىن ايتادى.
«جوعارىدا اتتارى اتالعان ازاماتتاردىڭ ساياسي قىزمەتتە بولعانىن بىلەمىز، ولاردىڭ مالىمدەمەلەرىنىڭ نەگىزى بار دەپ ەسەپتەۋگە بولادى. ءتىپتى ولاي بولماعان جاعدايدىڭ وزىندە، اقپارات ق پ ك 180-بابىنىڭ تالاپتارىنا سايكەس، تىركەلىپ سوتقا دەيىنگى تەرگەۋ جۇمىستارى جۇرگىزىلىپ، ونىڭ ناتيجەسى حالىققا حابارلانۋى كەرەك دەپ بىلەمىن. سەبەبى، ب ا ق- تا جاريالانعان قىلمىس تۋرالى اقپاراتتاردى س ت ب ت- عا تىركەۋ قۇقىق قورعاۋ ورگاندارى ءۇشىن تالقىلاۋدى قاجەت ەتپەيتىن، يمپەراتيۆتى نورما بولىپ تابىلادى. باس پروكۋراتۋرا - زاڭدىلىقتىڭ ورىندالۋىن قاداعالايتىن كونستيتۋتسيالىق ورگان رەتىندە، قوعامدا رەزونانس تۋدىراتىن ساياسي مالىمدەمەلەرگە دەر كەزىندە قۇقىقتىق باعا بەرۋى، دالەلدەر مەن دايەكتەر جەتكىلىكتى بولعان جاعدايدا قىلمىستىق ءىستىڭ سوتقا جەتكىزىلۋىن قامتاماسىز ەتۋى قاجەت»، - دەدى ابزال قۇسپان.